အနုပညာမြိုင်မှာ ခေတ်အဆက်ဆက်ပန်းချီလက်ရာတွေ ပြသထားရှိတဲ့ ပြခန်းရှိသလို ရုပ်ရှင်ပိုစတာ၊ ကာတွန်းပိုစတာ စတဲ့ရှားပါးတဲ့ပုံနှိပ်လက်ရာ အနုပညာမျိုးစုံကို စုဆောင်းထားရှိပါတယ်။ ဒီလက်ရာတွေကနေတဆင့် ခေတ်အမျိုးမျိုးအကြောင်းကို နားလည်လေ့လာနိုင်ပါတယ်။ လူထုအမှတ်သညာပွဲတော်ဆိုပြီး ကျင်းပခဲ့တဲ့ဓာပုံအဟောင်းတွေလည်း သောင်းနဲ့သိန်းနဲ့ချီပြီး စုဆောင်းထားရှိတဲ့အပြင် အခါအားလျော်စွာ ပြပွဲတွေစီမံခင်းကျင်းသွားဖို့လည်း အဆင်သင့်ရှိနေပါတယ်။
ပြခန်းတွင်းခင်းကျင်းမှုနဲ့ ပြခန်းပြင်ပခင်းကျင်းမှု နှစ်မျိုးလုံးထားရှိပါတယ်။ မြန်မာကဗျာတွေကို သစ်ပင်တွေအောက်မှာ ခံစားနိုင်ဖို့ ကဗျာတောအုပ်တစ်ခုလည်း အင်စတော်လေးရှင်း အနုပညာလိုရှိနေတယ်။ သီးခြားအနုပညာ သဘာဝဝန်းကျင်တစ်ခုပါ။
ပုပ္ပါးအနုပညာမြိုင်ရှိ ပြခန်း၊ ပြတိုက်များနှင့် နားနေဆောင်များ
၁။ ပန်မူရာခန်းမ
ပန်မူရာခန်းမသည် ပုပ္ပါးအနုပညာမြိုင်၏ အကြီးဆုံးခန်းမဖြစ်သည်။ ခေတ်သစ်၊ ခေတ်ဟောင်း ပန်းချီလက်ရာများကို ခင်းကျင်းပြသသွားမည့်နေရာဖြစ်ပါသည်။ ပင်မခန်းမအဖြစ် အမြဲတမ်းလဲလှယ် ပြသသွားပါမည်။
၂။ ဝသုန္ဒြေအမေခန်းမ
ဝသုန္ဒြေအမေခန်းမသည် စာအုပ်ပြတိုက်ဖြစ်၍ မြန်မာ့အသိဉာဏ်သမိုင်းကို ထင်ဟပ်ပြသသွားမည့် နေရာ ဖြစ်ပါသည်။ စာအုပ်များ၊ စာအုပ်ထုတ်လုပ်ခဲ့သော ဒီဇိုင်း၊ ဘလောက်တုံးများနှင့် ပုံနှိပ်ရာဇဝင်တို့ ပါဝင်ပါသည်။
၃။ လင်းဦးတာရာခန်းမ
လင်းဦးတာရာခန်းမသည် ပန်းချီ၊ ဒီဇိုင်း၊ အနုပညာကို အသုံးပြု၍ ပုံနှိပ်ခဲ့ကြသော ရုပ်ရှင်၊ စာအုပ်၊ ကာတွန်း၊ ဝါဒဖြန့်ချိရေးပိုစတာများကို ခင်းကျင်းပြသသွားမည့်နေရာ ဖြစ်ပါသည်။
၄။ ရွှေလသာဆောင်ခန်းမ
ဤခန်းမသည် ကျေးလက်နေထိုင်မှုဓလေ့နှင့် မြန်မာတို့၏ လူနေမှုပုံစံကို ကိုယ်စားပြုသည့် လက်သမားပညာနှင့် ဗိသုကာပညာတို့ကို မပျောက်ပျက်စေရန် ပြန်လည်တင်ဆက်၍ ခင်းကျင်းပြသမည် ဖြစ်ပါသည်။
၅။ အညာအထာခန်းမ
ဤခန်းမတွင် ခေတ်အဆက်ဆက် ကျေးလက်လူထု၏ ခေတ်အဆက်ဆက် စားသောက်ပုံ၊ ဝတ်စားဆင်ယင်ပုံတို့ကို ထင်ဟပ်စေသည့် အဆင်အကွက်များဖြင့် ခင်းကျင်းပြသမည့်နေရာ ဖြစ်ပါသည်။
၆။ စန္နကူးဆောင်
ပုပ္ပါးဒေသထွက် ကျောက်ပျဉ်ဆောက်လုပ်ထား၍ အခန်း (၅) ခန်း ပါရှိပြီး ရိုးရှင်းသော နေထိုင်မှုပုံစံဖြင့် တည်းခိုနိုင်သောအဆောင် ဖြစ်ပါသည်။
၇။ ရှုမဝဆောင်
ပုပ္ပါးတောင်မကြီးနှင့် တောင်ကလပ်တို့ကို အကောင်းဆုံးမြင်ကွင်းအနေအထားဖြင့် ရှုမျှော်ကြည့်ရှု နိုင်သည့် အဆောင်ဖြစ်ပါသည်။ ခေတ်မီအဆောင်ဖြစ်၍ ခေတ်သစ်ဗိသုကာပညာဖြင့် ဆောက်လုပ်ထားကာ အခန်း (၈) ခန်း ပါရှိပါသည်။
၈။ ပျားရည်အိမ်
မိသားစုဧည့်ခန်းတစ်ခုပါဝင်ကာ ကျယ်ကျယ်ဝန်းဝန်းနေထိုင်နိုင်သော ရိုးရာထရံကွက်များဖြင့် ဆင်ယင်ထားသောအဆောင် ဖြစ်ပါသည်။
Popa Art Resort 